„Við í Vakandi (og Vesturporti) leitum að ungu pari til þess að taka þátt í heimildarmyndinni okkar UseLess. Parið þarf að vera í sambúð, opið, ófeimið og tilbúið að læra ýmislegt nýtt um sóun á mat og fatnaði. Parið þarf að vera til í að hleypa okkur inn á heimili sitt og reiðubúið að gera breytingar á neysluvenjum sínum,“ segir Rakel Garðarsdóttir sem nú skipuleggur tökur á myndinni.
Hún segir að myndin verði frumsýnd á vormánuðum og að tökur byrji í desember. Þegar Rakel er spurð að því hvað parið fái fyrir að koma fram í myndinni segir hún að það sé ekki greitt með veraldlegum gæðum.
„Fólk fær betri heim í verðlaun. Það hljóta margir að vera til í það auk þess að breyta um lífsstíl. Það hljóta flestir að vilja það,“ segir hún.
Áhugasamir geta sent Rakel póst á vakandi@vesturport.com.