Guðbjörg Inga Guðjónsdóttir á fimm ára edrúafmæli í dag. Hún og eiginmaður hennar, Jóhann Traustason, töluðu opinskátt um fíkniefnaneyslu sína og leyfðu áhorfendum Stöðvar 2 að fá innsýn inn í líf fíkilsins. Fyrir tæpu ári síðan var Gugga í viðtali á Smartlandi Mörtu Maríu en það má teljast til kraftaverka að hjónin hafi náð að losna undan viðjum bakkusar og öllum hans félögum.
„Þetta er það lengsta sem Jói hefur verið edrú samfellt en ég var einu sinni edrú í sjö ár. Munurinn á þeim tíma og núna er sá að núna er ég hamingjusöm en það var ég ekki þá,“ segir Gugga í viðtali við Smartland Mörtu Maríu í fyrra og bætti við að nú vilji hún láta kalla sig Guðbjörgu. „Til að segja skilið við þetta gamla líf.“
Jói sagði skilið við Bakkus á frídegi verkalýðsins þann 1. maí 2011 og Guðbjörg fylgdi í kjölfarið. Hætti alveg þann 18 maí sama ár.
Guðbjörg segir muninn á edrúmennskunni nú og áður vera þann að þau eru loks farin að taka leiðsögn.
„Nú gerum við það sem okkur er sagt að gera. Tökum leiðsögn í fyrsta sinn og hermum eftir þeim sem eru búnir að vera edrú lengi. Við hellum upp á kaffi, heilsum fólki, stólum upp eftir 12 spora fundi og svona,“ segir Guðbjörg sem fór árlega í áfengismeðferðir frá árinu 2003 til 2011. „Ég hljóp bara alltaf út úr þessum meðferðum,“ segir hún.
Guðbjörg þakkar bæði samhjálp, 12 sporakerfinu og SÁÁ fyrir batann en hún byrjaði á Vogi og fór þaðan á Vík þar sem hún var í meðferð í mánuð og svo var hún á göngudeild SÁÁ í heilt ár á eftir.
„Núna er ég alltaf í vikulegri eftirfylgni hjá SÁÁ núna og við Jói erum með þrjá fasta tólf spora fundi sem við sækjum í hverri viku. Á hverjum morgni þegar ég vakna bið ég Guð að fá að vera edrú og legg allt mitt í hans hendur. Svo þakka ég fyrir mig á hverju einasta kvöldi,“ segir Guðbjörg og bætir við að jafnframt séu þau mjög ötul að hjálpa öðrum að verða edrú.
„Ég fer til dæmis reglulega með 12 spora fundi á deild 33A og svo förum við Jói saman reglulega með fundi á Hlaðgerðarkot. Ég segi aldrei nei þegar ég er beðin um hjálp og mér finnst mikilvægt að fólk átti sig á þessu. Það er nóg að gera eftir að maður verður edrú.“
HÉR er hægt að lesa viðtalið við Guðbjörgu í heild sinni.