Íslenska flothettan hentar ekki bara vel í íslenskri náttúru heldur er hún notuð víða um heim eins og sést á þessari mynd af Söruh Gerats sem er listamaður sem býr á Svalbarða. Á myndinni sést hún fljóta í ísköldu vatni.
Unnur Valdís vöruhönnuður og hönnuður flothettunnar segir að flothettan flæði skemmtilega um allan heim.
„Ég fæ oft sendar myndir af fólki að fljóta á fallegum og ég tala nú ekki um svona exótískum stöðum eins og þessum. Þessi kona þarna heitir Sarah Gerats, hún er listamaður sem hefur valið sér að búa á Svalbarða. Hún er mikil ævintýrakona og heldur utan um ferðir á Suðurskautið. Hún stundar sjóböð og hræðist ekki kuldann eins og sjá má. Hún hefur oft dvalið á Íslandi og kynntist flothettunni í einhverri Íslandsdvölinni,“ segir hún.
Unnur Valdís segir að hugmyndin um flothettuna gangi út á að njóta fljótandi slökunar og vellíðunar í vatni. Vörulínan sjálf samanstendur af flothettu og fótafloti sem er hannað til að veita líkamanum fullkominn flotstuðning í vatni. Hún segir að flotið hafi alið af sér skemmtilegan slökunarkúltur sem eigi vel við á Íslandi þar sem baðmenning sé mjög ríkjandi. Víða um land er boðið upp á samflot og má fylgjast með dagskránni á Facebook síðu Flothettunnar.