Á fasteignavef mbl.is er húsnæðið sem hýst hefur Grænan kost frá upphafi auglýst til sölu. Sólveig Eiríksdóttir, eða Solla eins og hún er kölluð, og Hjördís Gísladóttir stofnuðu veitingastaðinn árið 1995 og varð hann fljótt einn vinsælasti heilsustaður landsins. Það var ekkert skrýtið enda bauð enginn veitingastaður upp á hveiti-, ger- og mjólkurlausa grænmetisrétti á þessum tíma og þeir sem vildu lifa á jurtafæði tóku ástfóstri við staðinn.
Árið 2004 skildu leiðir Hjördísar og Sollu þegar sú fyrrnefnda keypti þá síðarnefndu út úr fyrirtækinu. Árið 2007 seldi Hjördís veitingastaðinn til Himneskrar hollustu sem Solla stýrði á sínum tíma. Árið 2008 bárust fréttir af því að Róbert Wessman eða fyrirtæki hans, Salt Investments, hefði í samstarfi við hluthafa sömu fyrirtækja keypt Grænan kost, Mann lifandi, Bíóvörur og Himneska hollustu.
„Í tilkynningu segir að markmið sameiningarinnar sé að búa til öflugt fyrirtæki, sem byggist á þeirri sýn, að hollt mataræði stuðli að heilbrigði og auki lífsgæði. Yfirlýst markmið nýja félagsins sé að bæta mataræði og neysluvenjur ungra sem aldinna og huga jafnframt að útvíkkun á starfsemi félagsins til annarra landa,“ sagði á frétt mbl.is um málið.
Hjördís Ásberg, fyrrverandi eigandi Manns lifandi, eignaðist húsnæðið við Skólavörðustíg 8 árið 2009 en síðan í september 2010 hefur húsnæðið verið í eigu einkahlutafélagsins Vatnsholt ehf.
Á dögunum keypti Solla Eiríks nafnið Grænn kostur úr þrotabúi Lifandi markaðar um leið og fyrirtæki hennar Gló keypti þrotabú fyrirtækisins í Fákafeni og í Hæðarsmára.
Verðið á húsnæðinu sem stendur við Skólavörðustíg 8 er ekki gefið upp en fasteignamat húsnæðisins er 30.650.000 kr.