Smartland Mörtu Maríu er undir töluverðum sænskum áhrifum þessa dagana eftir að hafa heimsótt Svíþjóð á dögunum. Sænskar spariguggur eru ekki bara fallega klæddar upp til hópa heldur eru heimili þeirra í flestum tilfellum einstök. Sér í lagi hjá þeim sem kjósa að opna heimili sín fyrir alþjóð eins og Anna gerði. Hún býr í Bromma sem er rétt fyrir utan Stokkhólm. Vefurinn The Way We Play heimsótti hana í haust og myndaði heimili hennar í bak og fyrir.

Það sem einkennir heimili Önnu er hvað litapallettan er mjúk og hvað allt er vandað. Á gólfunum er parket með fiskibeinamunstri og eru flestir veggir hvítmálaðir. Appelsínugulur sófi prýðir stofuna og í húsinu eru innbyggðar hillusamstæður í grábláum tón.

Heimilið er búið ákaflega vönduðum húsgögnum. Anna er til dæmis með kúluvasann sem fæst í Svenskt Tenn, sem er ein fínasta verslun Stokkhólms, og hún er líka með leðurstóla í eldhúsinu sem fást hérlendis í Casa. HÉR er hægt að skoða heimilið í heild sinni.