Eigendur veitingastaðarins Borðið við Ægisíðu hafa sett glæsilega íbúð sína á sölu. Íbúðin er ansi vönduð en þar mætast marmari, brass og viður á sjarmerandi hátt. Íbúðin stendur við Hrólfsskálamel 18 og er 310 fermetrar. 

Íbúðin er í eigu hjónanna Jóns Helga Sen Erlendssonar og Martinu Vigdísar Nardini. Auk þess að reka Borðið ásamt vinahjónum sínum starfar hann í byggingarbransanum og hún er læknir. Hjónin hönnuðu íbúðina sjálf og er hugsað út í hvert smáatriði. Fólk sem hefur áhuga á hönnun getur á góða stund í vændum því myndirnar eru algert augnakonfekt. Þau reka einnig fyrirtækið Pipistrello sem framleiðir skurðarbretti, kertastjaka og fleira fallegt til heimilisins. 

Í eldhúsinu er svört viðarinnrétting og eru marmaraborðplötur á þeim. Það sem er sérstakt er að fyrir ofan vegginn eru marmaraflísar og spilar þetta allt ótrúlega vel saman. Marmarinn er sérvalinn af hjónunum en í nýjasta Hús og Híbýli segja þau frá því þegar þau fóru til Ítalíu til að sérvelja marmarann. 

Af fasteignavef mbl.is: Hrólfsskálamelur 18