Klara Bjartmarz, framkvæmdastjóri KSÍ, greindi í dag frá gistiplönum íslenska landsliðsins í Rússlandi næsta sumar. Landsliðið og fylgdarlið þess mun gista á Hótel Nadezhda sem er fimm stjörnu hótel í strandbænum Gelendzhik við Svartahafið.
Það er allt til alls á Hótel Nadezhda, stutt er á ströndina, tennisvöllur er á hótelinu og að sjálfsögðu er knattspyrnuvöllur í nágrenninu. Það eru fjórir veitingastaðir á hótelinu en það verður þó ólíklegt að strákarnir njóti góðs af því enda var íslenskur kokkur með í för á EM í fyrra.
Miðað við myndirnar er nokkuð ljóst að stíllinn á hótelinu er töluvert frábrugðinn hótelinu í Annecy sem þeir gistu á á EM í Frakklandi. Það fer ekki fram hjá hótelgestum að þeir séu mættir til Austur-Evrópu enda virðast skandinavískir tískustraumar ekki hafa náð til Gelendzhik. Sérstaka eftirtek vekur veggfóður í einum veitingasalnum en þar má sjá hús í rússneskum stíl.
Hótelið býður upp á fjölmarga gistikosti allt frá venjulegum hótelherbergjum upp í íbúðargistingu og þriggja herbergja villu.