Pistlar:

Mér hefur alltaf þótt eitthvað sérstakt við töluna 21 enda hefur hún verið mikil happatala í mínu lífi. Nú er senn að ljúka mínum 21. degi í HREIN detox kúrnum - og ég hef tekið ákvörðun um að halda áfram til mánaðarmóta. Það kann að vera að ég breyti síðustu dögunum aðeins og flytji mig þá yfir í lifrarhreinsun, en áfram ætla ég að halda út mánuðinn.

Yfirleitt hef ég látið duga að gera annað hvort jóga á morgnana eða fara í gönguferð, en í dag gerði ég hvorttveggja. Sólin var reyndar farin á bak við ský þegar ég loks kom mér út, en það var hressandi að hreyfa sig í kuldanum og ég er ekki frá því að ég hafi hreyft mig aðeins hraðar en vanalega, bara til að halda á mér hita. Síðdegis var það svo ristilskolun númer þrjú í þessu ferli sem skilaði góðum árangri.

Á morgun fer ég í blóðprufu, sem ég fæ niðurstöðu úr í næstu viku. Hún mun sýna mér hvaða breytingar hafa orðið á meðan ég hef verið á þessum kúr og eins hvort ég sé orðin nægilega öflug til að geta haldið áfram án skjaldkirtilslyfja. Hef ekki mikið fundið fyrir því að vera hætt á þeim, en tek samt tillit til þess sem blóðrannsóknin segir og læknirinn ráðleggur mér í þeim málum.

Í fyrramálið á ég líka tíma hjá Matthildi Þorláksdóttur heilpraktíker. Ég hef verið hjá henni í nokkur ár og fer alltaf reglulega til að láta taka stöðuna á líkamanum mínum. Hún mun skoða þjálni blóðsins, mæla orkuna í líkamanum, styrk líkamskerfanna og hvort mér hefur tekist að losna við þungmálma úr líkamanum. Bíð spennt að sjá hvað kemur út úr því.