Prentútgáfa Morgunblaðsins var í annarri stærð en venjulega þegar blaðið kom inn um bréfalúgur landsmanna í morgun. Blaðið var helmingi stærra en venjulega og minnti meira á prentútgáfur frá erlendum stórblöðum en hefðbundnu broti Morgunblaðsins.
Þegar prentvélarnar fóru í gang í Landsprenti í gærkvöldi var fagnað með þeim sem komu að breiðsíðunni. Þar á meðal var starfsfólk hjá N1 og Íslensku auglýsingastofunni auk starfsmanna Morgunblaðsins.
Þetta er þó ekki í fyrsta skipti sem Morgunblaðið kemur út í þessu stóra broti því það gerðist um nokkurra mánaða skeið síðla árs 1919 og fram á árið 1920. Breiðsíða Morgunblaðsins er þó ekki nýtt form heldur var um einstakan viðburð að ræða. Á morgun kemur blaðið aftur í venjulegri stærð.