Hótel Saga er 55 ára og bauð viðskiptavinum og velunnurum í gleðistund í Súlnasal en nú á að endurnýja salinn í tilefni af afmælinu. 

Ingibjörg Ólafsdóttir hótelstjóri bauð gesti velkomna og lýsti þeim breytingum sem fram undan eru. Nefndi hún sérstaklega upprunalegu stóla hótelsins sem geymdu hin ýmsu leyndarmál en nú ætti meðal annars að endursmíða þá í þeirra upprunalegu mynd. Hún ítrekaði að ekki ætti að umturna Súlnasalnum heldur endurnýja, halda í hefðir og virða söguna.

Sigríður Thorlacius og Karl Olgeirsson skemmtu gestum ásamt Ragga Bjarna en hann söng einmitt með hljómsveit sinni 3 – 4 sinnum í viku í Súlnasal í um 20 ár og því vel við hæfi að hann tæki lagið.

Boðið var upp á smakk af nýjum matseðli sem sló í gegn en ýmsar nýjungar munu líta dagsins ljós á afmælisárinu. Mikil og sterk matarmenning er á Hótel Sögu og mun hótelið halda áfram að byggja á henni en Grillið komst m.a. á Michelin-listann í ár.