„Mér hefur alltaf verið hafnað“

„Ég er eina tónlistarkonan og lagahöfundurinn sem hefur verið útilokuð frá Iceland Airwaves og öllum ríkisreknum styrkjum. Í hvert skipti sem ég hef óskað eftir því að fá að syngja á hátíðinni hefur mér verið hafnað, öll þessi ár hef ég alltaf fengið svarið nei og mér sagt að það væri allt fullbókað,“ segir tónlistarkonan Leoncie og er ekki sátt.

Hún gefst þó ekki upp og er að skipuleggja Íslandsferð á eigin kostnað. „Ég er að vinna að splunkunýjum lögum og myndböndum á minn eigin kostnað.“

Leoncie sendi inn lag í Evróvisjón-sönglagakeppni Sjónvarpsins og vonast eftir því að komast áfram. „Aðdáendur mínir segja við mig að ég ætti að flytja til Svíþjóðar eða Danmerkur því Danir og Svíar eru svo opnir fyrir alls konar fólki. Ætli ég birtist ekki óvænt á Íslandi án þess að láta nokkurn mann vita,“ segir hún og hlær.

Leoncie er tilbúin með jólasmellinn í ár og heitir lagið Mr. December eða Herra desember. „Lagið mitt er öðruvísi en öll jólalög því ég syng ekki um jólasveininn því hann er ekki til,“ segir hún.

• 1 blogg um fréttina

Bloggað um fréttina

• Jón Snæbjörnsson: Ekki geta allir verið "sætir" sem sykurmolar .....