Unnur Birna Vilhjálmsdóttir alheimsfegurðardrottning segir það ekki vera neitt grín að vera svona falleg. Hún græði ekkert á þessu og þurfi sjálf að borga í strætó.
Helgi Jean Classen, ritstjóri menn.is, hefur nú hafið landsátak til að hjálpa fallega fólkinu.
„Ég fór af stað með landsátak til að hjálpa hóp sem hefur ekki átt sér neinn almennilegan málsvara. Það getur verið að fallegt fólk lifi ótrúlega frábærum og innihaldsríkum lífum en oft getur verið krefjandi að burðast með andlit sem allir vilja horfa á. Stundum vill fallegt fólk líka þurfa að vinna fyrir því að vera hrósað - en ekki fá það bara sjálfkrafa.
Það er líka mikilvægt að muna að þetta er hlutskipti sem enginn velur sér heldur fæðist fólk fallegt. Þess vegna þegar maður sér manneskju í þessu ástandi á maður að sýna samkennd fyrir öllum vanda hennar. Oft fylgir fegurðinni líka ákveðin afneitun þar sem fólk vill ekki viðurkenna fyrir sjálfu sér að það sé fallegt. Og því er alls ekki ólíklegt að þessi nauðstadda fallega manneskja birtist í speglinum heima hjá þér. Allavega hefur það oft gerst fyrir mig,“ segir Helgi Jean.