Hlynur Sigurðsson stýrir þættinum Golfið sem sýndur er á RÚV á þriðjudögum í sumar. Ég spurði hann spjörunum úr.
Hvað er á döfinni hjá þér í sumar?
Það kemst fátt annað að en golf í sumar. Ég og Benni (Benedikt Nikulás Anes Ketilsson) vinnum við gerð golfþáttarins á RÚV og fylgjum eftir Eimskipsmótaröðinni. Þar af leiðandi eyðum við allt að því óeðlilega miklum tíma saman. Geri þó ráð fyrir því að ferðast eitthvað til útlanda í haust.
Hvert er uppáhaldslandið þitt/borgin þín?
Ég er rosalega hrifinn af Spáni enda bjó ég í Granada í Andalúsíu í eitt ár. Það er algjörlega frábær borg. Annars finnst mér alltaf gaman að koma til New York - hún er eitthvað svo mögnuð. Svo væri ég alveg til í að koma aftur til Vegas.
Ertu duglegur að elda?
Já, ég er bara nokkuð liðtækur. Það er ekkert í uppháhaldi að elda kjötbollur í brúnni eða eitthvað hversdags. En ég fíla að elda á laugardögum og gefa mér góðan tíma í það.
Horfir þú mikið á sjónvarp eða hlustar þú mikið á útvarp?
Já, ég horfi þónokkuð á sjónvarp. Mér finnst það bara afslappandi og fínt. Ég get tekið heilu sjónvarpsseríurnar og spænt þér í mig. Er búinn með allt þetta helsta og er eiginlega í hálfgerðum vandræðum með hvað á að horfa á þessa dagana. Þannig að allar hugmyndir eru vel þegnar.
Áttu gæludýr?
Nei - ekki eftir að Tralli dverghamstur fór á vit feðra sinna.
Hvaða flík finnst þér að allir karlmenn þurfi að fjárfesta í fyrir sumarið?
Já, þú segir nokkuð. Miðað við hvernig tíðin hefur verið er lógískast að segja góðan regnfatnað og stígvél. Annars er ég einn þeirra sem finnst gaman í fatabúðum og elska að gera góða díla - þannig að ég kaupi mér alltaf eitthvað á útsölunum.
Hver er fallegasta kona heims, fyrir utan maka?
Natalie Portman er stórglæsileg - og hefur eitthvað meira við sig en bara útlitið.
Hver er uppáhaldsmaturinn þinn?
Mér finnst grillaðar lambalundir algjörlega geggjaðar. Þótt ég fíli gott nautakjöt líka þá hafa lundirnar vinninginn. Ekki verra að hafa Ranch-sósuna frá Kjötgalleríinu í Hafnarfirði með.
Borðar þú morgunmat?
Já, og það er alveg sérstök rútína sem fer í gang á morgnana. Litla tveggja ára dóttir mín hjálpar mér alltaf að hella upp á könnuna, alveg heilmikil seremónía í kringum það og svo borða ég tvær ristaðar brauðsneiðar með osti. Var reyndar að byrja í CrossFit XY um daginn þar sem ég heyrði að maður ætti helst ekki að borða fyrr en kl. 10 - og helst ekki brauð. En ég er samt að pæla í að halda í þennan vana og mæta bara einu sinni í viku oftar í ræktina í staðinn - er það ekki ok?
Klukkan hvað vaknar þú á morgnana?
Ég verð seint talinn morgunhani. Ég hef aldrei skilið þá sem rífa sig upp kl. 6 til að fara í ræktina. Ég hef oft sagt í djóki að ég vakni ekki fyrir kl. 7 nema að ég fái að kaupa tollinn í fríhöfninni. En til að svara spurningunni vakna ég yfirleitt kl. 7.30 - helst seinna ef ég kemst upp með það.
Hver er draumurinn?
Ég vann með Magga Scheving um tíma og horfði á hann gera endalausar armbeygjur á einni hendi. Ég er dálítið að treysta á að Crossfitið reddi þessu. En ég geri mér þó grein fyrir að þetta er háleitt markmið, þar sem ég er með vandræðalega mjóa upphandleggi.