Margret Hrafnsdóttir prýðir forsíðu MAN. Í gær sagði Smartland Mörtu Maríu frá því að Margret og fjölskylda hennar hafi upplifað mikinn öldugang þegar sonur þeirra Ragnar kom út úr skápnum sem transgender kona. Í viðtalinu talar Margret einnig um samband sitt við Jón Óttar Ragnarsson, en þau hafa verið par í 26 ár eða frá því hún var 19 ára og hann 44 ára.
„Það voru margir með sterkar skoðanir á þessu sambandi okkar í byrjun, ég var vöruð og jafnvel stöðvuð úti á götu til þess,“ segir Margret m.a. í viðtalinu við MAN. Hún segir jafnframt að frelsi sé mikilvægt ef samband eigi að blómstra.
„Ég trúi ekki á að vantreysta eða hefta hvort annað. Ég hef algjört frelsi til athafna, ég vinn með mikið af fallegum karlleikurum og við erum bæði innan um magnað fólk alla daga og þá er traust algjörlega nauðsynlegt. Við höfum rætt opið samband og hvað það þýðir og hvaða áhrif það hefur. Við erum bæði algjörlega á móti framhjáhaldi,“ segir Margret og bætir við að hún telji alla slíka umræðu góða og almennt að ræða aðra vinkla á hlutunum. Þau hjónin klæmist við hvort annað, bryddi upp á nýjungum í kynlífinu og sendi hvort öðru sexý sms skilaboð til að viðhalda neistanum.