Sænska krónprinsessan Viktoría þjáðist af átröskun á sínum yngri árum, en hún opnaði sig um baráttuna í nýlegri heimildamynd. Þá segir hún að álagið sem fylgdi konunglegum skyldum hafi sett strik í reikninginn, en hún var 18 ára þegar hún fór að starfa fyrir krúnuna og sinna opinberum skyldum.
Í nóvember 1997 greindi sænska konungsfjölskyldan frá því að Viktoría þjáðist af átröskun, en hún sótti sér hjálp við veikindum sínum í Bandaríkjunum eins og fram kemur í frétt Daily Mail.
„Ég vildi gera meira en ég gat með raunsæjum hætti,“ segir Viktoría í nýrri heimildamynd, þar sem fjallað er um ævi hennar.
„Ég þurfti tíma til að ráða fram úr hlutunum og ná jafnvægi á ný. Ég þurfti að kynnast sjálfri mér betur, átta mig á því hvar mörkin mín liggja og vera ekki stöðugt að ganga fram af mér.“
Krónprinsessan viðurkenndi þó að hún væri enn ekki laus við fullkomnunaráráttuna, en í dag segist hún nýta hana til að starfa fyrir land sitt.