Fantagott fyrir smáhesta

Roberto Cavalli sýndi sumartískuna í Mílanó og ofurfyrirsætan Heidi Klum var í sviðsljósinu þegar hún mætti. Ofurfyrirsætan var að sjálfsögðu í alklæðnaði frá Cavalli þegar hún mætti en fyrrnefnt dress samanstóð af blússu og buxum úr sama efni.

Þessi tíska hefur verið að ryðja sér til rúms en hún gengur út á að vera í alklæðnaði úr sama efni. Tom Ford lék sér með þetta á tískuvikunni í Lundúnum á dögunum þegar hann mætti í gallabuxum við gallaskyrtu og var svo í dökkum jakka yfir. Ýmist dáðust menn að þessari fatasamsetningu eða fyrirlitu.

Sjálf er ég afar hrifin af svona samlitum fötum því í þannig klæðnaði virkum við einhvern veginn lengri og mjórri en við erum í raun og veru. Svona smáhestar eins og undirrituð þurfa bara reglulega á því að halda ...