Jenner eins og Frida Kahlo á tískupöllunum

Kendall Jenner gengur tískupallana eins og enginn sé morgundagurinn. Það er kannski ekkert skrýtið því útlit hennar, þetta dökka síða hár og tindrandi brúnu augu, passa eitthvað svo ofurvel við tískupalla nútímans. Á sýningu Dolce & Gabbana þar sem sumartískan 2015 var kynnt í Mílanó sýndi hún á sér aðra hlið og minnti meria á Fridu Kahlo, sem var mexíkósk listakona, en eitthvert Hollywood-beib.

Hönnuðirnir sóttu innblástur til Spánar og notuðu rauðan lit af miklum móð, bróderuðu yfir sig og settu blóm í hárið. Hárið á tískusýningardömunum minnti undirritaða á hvað það er alltaf fallegt að vera með skipt í miðju og taka hárið í snúð að aftan. Þetta er ekta greiðsla til að framkvæma þegar maður hefur engin tíma til að blása og krulla.

Það sem kom einna mest á óvart í sýningunni voru bróderuðu nælonsokkarnir - guðdómlegir alveg hreint í alla staði.