Öppdeitaðu stílinn fyrir veturinn

Haustið í allri sinni dýrð er einn besti tískutími ársins. Það er náttúrlega ekki nauðsynlegt að endurnýja alveg fataskápinn sinn, en það er alltaf gaman að bæta við einhverju smotteríi til að hressa upp á sig. 

Haustískan í ár er töluverð áskorun fyrir íslenskar konur sem vilja helst vera svartklæddar frá toppi til táar. Íslenskar konur halda nefnilega að þær sýnist svo slank ef þær eru svartklæddar.

Auðvitað er það tómur misskilningur að við sýnumst rýrari í svörtu. Þetta er allt bara spurning um að velja föt sem klæða okkur sjálfar og eru úr fallegum efnum og í litum sem henta okkar húðtón.

Í hausttískunni verður ekki þverfótað fyrir flaueli, rúskinni, velúr og blómamunstri. ERDEMxHM línan hefur sett ákveðinn tón en í þeirri línu eru rósóttir kjólar og skyrtur áberandi.

Í haust eigum við að vera í stíl, vera í efri og neðri parti úr sama efni og helst í kápu yfir í sama lit.

Litapallettan er mjúk. Það er töluvert um rústrautt, vínrautt, flöskugrænan og rauðan. Dökkblár á líka góða spretti.