Stjarnan er langbesta liðið í knattspyrnu kvenna í ár og það var undirstrikað í bikarúrslitaleiknum á Laugardalsvelli um helgina. Jafnvel í úrslitaleik þar sem liðið nær sér illa á strik, gegn óhemju baráttuglöðum andstæðingum, tekst Stjörnukonum að vinna 4:0-sigur sem aldrei nokkurn tímann var í einhverri hættu.
Stjarnan fór í gegnum alla keppnina án þess að fá á sig mark, 360 mínútur takk fyrir!
Þar með hefur Stjarnan landað tveimur bikarmeistaratitlum og tveimur Íslandsmeistaratitlum á síðustu fjórum árum, og allt útlit er fyrir að liðið taki tvennuna í ár. Þetta eru einu stóru titlarnir í knattspyrnusögu félagsins, svo óhætt er að tala um svakalegan uppgang síðustu ár. Ásgerður Stefanía Baldursdóttir, fyrirliði Stjörnunnar og driffjöðrin í þessum uppgangi, segist hafa átt von á eins erfiðum leik og raun bar vitni.
„Ég bjóst alveg við Selfyssingum svona sterkum. Þær náðu að brjóta niður okkar spil og gerðu það virkilega vel. Við spiluðum ekkert frábærlega að þessu sinni en unnum samt 4:0, sem er jákvætt,“ sagði Ásgerður.
Nánari umfjöllun má finna í átta síðna íþróttablaði Morgunblaðsins í dag.