Freyr Alexandersson, landsliðsþjálfari kvenna í knattspyrnu, kynnti í dag leikmannahópinn sem fer til Portúgals og keppir í Algarve-bikarnum. Freyr segist horfa til frammistöðu frekar en úrslita að þessu sinni á mótinu.
„Við þurfum að fá eins mörg svör í þessu móti og við mögulega getum. Þegar við förum í leikina á móti Slóvakíu og Hollandi í apríl þá þurfum við ekki að prófa einhverja hluti heldur getum við þá reynt að fínpússa atriði sem við höfum þegar prófað. Mér finnst mikilvægt að liðið verði á þeim stað þegar við förum í þá leiki. Þá getum við einbeitt okkur betur að litlum atriðum og af meiri nákvæmni. Ég er alveg til í að lenda á veggjum í Portúgal og leysa þær þrautir sem kunna að koma upp,“ sagði Freyr þegar mbl.is ræddi við hann á blaðamannafundi í dag.
Spurður um hvaða leikmenn hann hefði viljað velja sem ekki er að finna í hópnum sem fer til Portúgals þá nefndi Freyr fjögur nöfn. „Harpa Þorsteinsdóttir er barnshafandi og Hólmfríður Magnúsdóttir er meidd. Þær hefðu verið í hópnum en einnig eru Ásgerður Stefanía Baldursdóttir og Svava Rós Guðmundsdóttir meiddar en þær hafa verið í kringum liðið. Annars veit ég ekki af neinum stórvægilegum meiðslum.“
Flestar í leikmannahópnum þekkja landsliðsverkefnin vel en Freyr minntist sérstaklega á tvo leikmenn sem hann tekur inn í hópinn að þessu sinni. „Thelma Björk Einarsdóttir er að koma til baka eftir krossbandsslit en það kom bakslag í endurhæfinguna hjá henni oftar en einu sinni. Hún er í gríðarlega góðu standi og hefur komið mjög vel út úr öllum mælingum hjá okkur. Auk þess er hún að spila mjög vel með Val á undirbúningstímabilinu. Thelma er klókur leikmaður og ég hlakka til að sjá hvar hún stendur núna á alþjóðlegum mælikvarða. Sigríður Lára Garðarsdóttir spilaði vel með ÍBV í fyrra og heldur áfram að bæta sinn leik. Hún var með okkur í æfingabúðum bæði í október og janúar og stóð sig vel. Hún kemur einnig vel út úr öllum líkamlegum mælingum og mig langar að gefa henni tækifæri,“ sagði Freyr Alexandersson.