Robbie Brady, leikmaður Írlands, kom sér í sögubækur Evrópumótsins í knattspyrnu þegar hann skoraði gegn Frökkum í sextán liða úrslitunum í dag.
Írland fékk vítaspyrnu eftir eina mínútu og 58 sekúndur, sem er fljótasta víti í sögu Evrópumótsins. Brady kom boltanum í netið skömmu síðar og bætti þar með met Luka Modric, sem skoraði á fjórðu mínútu af vítapunktinum fyrir Króatíu á EM 2008 gegn Austurríki.
Ekki dugði það Írum hins vegar sem eru úr leik eftir að Frakkar komu til baka og unnu 2:1 sigur.