Hollendingurinn Björn Kuipers dæmir viðureign Frakka og Íslendinga í 8-liða úrslitum Evrópumótsins í knattspyrnu sem fram fer á Stade de France, þjóðarleikvangi Frakka, á sunnudagskvöld.
Kuipers, sem er 43 ára gamall, hefur verið FIFA-dómari frá árinu 2006. Hann hefur dæmt marga stórleiki, þar á meðal úrslitaleikinn í Meistaradeildinni árið 2014 og úrslitaleikinn í Evrópudeildinni árið 2013.
Hollendingurinn hefur dæmt tvo leiki á Evrópumótinu. Hann dæmdi viðureign Þjóðverja og Pólverja á Stade de France og leik Króata og Spánverja í Bordeaux.