Roy Hodgson, knattspyrnustjóri Fulham, er himinlifandi yfir því að félagið hafi náð að klófesta enska landsliðsframherjann Andy Johnson, en Fulham keypti hann í gær frá Everton á 10,5 miljónir punda.
„Ég hef ekkert farið í grafgötur með áhuga minn á að fá Johnson til liðs við Fulham og ég er því að vonum mjög ánægður með að það tókst,“ sagði stjórinn í gær þegar ljóst var að samningar höfðu tekist.
Johnson gerði 22 mörk í 74 leikjum með Everton og telur Hodgson að hann eigi eftir að skora mikið fyrir Fulham. „Hann hefur þá hæfileika sem til þarf og á eftir að falla vel inn í leikmannahóp okkar,“ segir stjórinn, en Johnson er ellefti leikmaðurinn sem Fulham kaupir eftir að félagið tryggði sér áframhaldandi sæti í úrvalsdeildinni í lokaumferðinni í vor.