Carlo Ancelotti knattspyrnustjóri Chelsea hefur staðfest að Didier Drogba verði í byrjunarliðinu þegar liðið tekur á móti Everton í endurteknum leik í 4. umferð ensku bikarkeppninnar í knattspyrnu í hádeginu á morgun.
Drogba var settur á bekkinn þegar Chelsea átti í höggi við Fulham á mánudaginn en Fernando Torres lék einn í fremstu víglínu. Torres er ekki gjaldgengur í leiknum á morgun þar sem hann spilaði með Liverpool í bikarnum og Brasilíumaðurinn David Luiz er heldur ekki löglegur þar sem félagaskipti hans voru ekki orðin að veruleika þegar liðin áttust við á Goodison Park.
,,Drogba mun byrja en ég á eftir að velja framherja sem ég mun nota með Drogba,“ segir Ancelotti á vef félagsins,
Rússinn Júrí Zhirkov verður í leikmannahópi Chelsea í fyrsta skipti frá því í nóvember en hann hefur jafnað sig af meiðslum.