Talið er afskaplega ólíklegt að nýir eigendur Swansea séu reiðubúnir að selja íslenska landsliðsmanninn Gylfa Þór Sigurðsson. Everton hefur áhuga á því að klófesta miðjumanninn knáa.
Bandaríkjamennirnir Steve Kaplan og Jason Levien keyptu sig inn í félagið og eiga nú rúmlega 60% hlut í félaginu, sem hafnaði í 12. sæti í ensku úrvalsdeildinni í knattspyrnu. Þeir hafa hug á því að styrkja félagið og því er ekki á dagskránni að selja lykilmenn.
Samkvæmt frétt Wales online verður það eitt af fyrstu verkum Kaplans og Leviens hjá Swansea að bjóða Gylfa Þór nýjan samning við félagið en í gær bárust fréttir af því að Everton ætlaði að gera tilboð í Gylfa.