Fernando Alonso hjá McLaren var í þessu að vinna ráspól Mónakókappakstursins, hinn fyrsta sem kemur í hlut McLaren á árinu. Í síðustu tilraun á síðustu sekúndum komst hann fram úr liðsfélaga sínum Lewis Hamilton sem ekið hafði hraðar allan tímann og missti því af sínum fyrsta pól á ferlinum. Felipe Massa á Ferrari varð þriðji, komst fram úr Giancarlo Fisichella á Renault á síðustu stundu.
McLarenþórarnir kepptu um fyrsta sætið í tímatökunum út í gegn og blandaði enginn sér í þá baráttu. Hamilton ók hraðar á fyrsta kafla brautarinnar en dæmið snerist við á öðru tímasvæðinu, þar ók Alonso mun hraðar.
Massa hélt uppi heiðri Ferrari með því að hreppa þriðja sætið af Fisichella á sínum lokahring en hann hóf hann er nokkrar sekúndur lifðu eftir af tímatökunni. Liðsfélagi Massa, Kimi Räikkonen, gerði sig sekan um mistök sem ekki eiga að sjást hjá topp ökumanni; ók utan í vegg á leið inn í hlykkbeygju á sundlaugarsvæðinu og skemmdi stýris- og fjöðrunarbúnað.
Atvikið átti sér stað í byrjun annarrar lotu og vélvirkjar Ferrari höfðu ekki tíma til að gera við skemmdina svo hann gæti haldið áfram. Náði hann ekki Rascasse-beygjunni og stoppaði þar; á svipuðum stað og Michael Schumacher vann sér til óhelgi í tímatökunum í fyrra er hann hindraði för keppinautanna af ásettu ráði.
Minnstu munaði að Massa lokaðist milli Räikkönen og veggjarins en þeim síðarnefnda tókst á endanum að koma Ferrarinum í bakkgír og leysa úr flækjunni.
Fisichella vann besta árangur Renault í tímatökum á árinu og Nico Rosberg og Mark Webber gerðu hið sama fyrir Williams og Red Bull með fimmta og sjötta sæti.
David Coulthard á Red Bull komst í hóp 10 fremstu en árangur hans í annarri lotu var síðan strikaður út í refsingarskyni fyrir að hindra Heikki Kovalainen á Renault. Coulthard var á úthring en Kovalainen á hröðum og hélt Skotinn hinum finnska nýliða fyrir aftan sig hálfan hring án þess að víkja. Með refsingunni féll hann niður í 16. sæti.
Fyrir bragðið komust báðar Hondurnar í lokalotuna í fyrsta sinn á árinu. Rubens Barrichello vann 10. sætið með því að aka hringinn á þremur þúsundustu úr sekúndu betri tíma en Jenson Button sem síðan fékk að halda áfram vegna refsingar Coulthard.
Vitantonio Liuzzi á Toro Rosso sló í gegn í fyrstu lotu með því að setja fjórða besta tíma og varð á endanum í 12. sæti sem er hans besta í ár. Varð hann m.a. á undan landa sínum Jarno Trulli á Toyotu. Toyotaliðið átti hörmulegan dag með Trulli í aðeins 14. sæti og Ralf Schumacher komst ekki áfram úr fyrstu lotu og hefur keppni í 20. sæti.
Úrslit tímatökunnar urðu annars sem hér segir:
Tímatakan í Mónakó | Lota 1 | Lota 2 | Lota 3 | ||||||||
Röð | Ökuþór | Bíll | Röð | Tími | Hri. | Röð | Tími | Hri. | Röð | Tími | Hri. |
1. | Alonso | McLaren | 2. | 1:16.059 | 8 | 1. | 1:15.431 | 3 | 1. | 1:15.726 | 11 |
2. | Hamilton | McLaren | 1. | 1:15.685 | 6 | 2. | 1:15.479 | 4 | 2. | 1:15.905 | 12 |
3. | Massa | Ferrari | 5. | 1:16.786 | 8 | 5. | 1:16.034 | 7 | 3. | 1:15.967 | 12 |
4. | Fisichella | Renault | 12. | 1:17.596 | 7 | 6. | 1:16.054 | 6 | 4. | 1:16.285 | 11 |
5. | Rosberg | Williams | 6. | 1:16.870 | 9 | 7. | 1:16.100 | 3 | 5. | 1:16.439 | 12 |
6. | Webber | Red Bull | 14. | 1:17.816 | 7 | 9. | 1:16.420 | 6 | 6. | 1:16.784 | 12 |
7. | Heidfeld | BMW Sauber | 10. | 1:17.385 | 5 | 4. | 1:15.733 | 7 | 7. | 1:16.832 | 12 |
8. | Kubica | BMW Sauber | 11. | 1:17.584 | 5 | 3. | 1:15.576 | 7 | 8. | 1:16.955 | 12 |
9. | Barrichello | Honda | 8. | 1:17.244 | 10 | 10. | 1:16.454 | 6 | 9. | 1:17.498 | 11 |
10. | Button | Honda | 9. | 1:17.297 | 10 | 11. | 1:16.457 | 6 | 10. | 1:17.939 | 12 |
11. | Wurz | Williams | 16. | 1:17.874 | 9 | 12. | 1:16.662 | 7 | |||
12. | Liuzzi | Toro Rosso | 4. | 1:16.720 | 11 | 13. | 1:16.703 | 6 | |||
13. | Trulli | Toyota | 13. | 1:17.686 | 8 | 14. | 1:16.988 | 6 | |||
14. | Kovalainen | Renault | 15. | 1:17.836 | 8 | 15. | 1:17.125 | 8 | |||
15. | Räikkönen | Ferrari | 3. | 1:16.251 | 9 | 16. | No time | 2 | |||
16. | Coulthard* | Red Bull | 7. | 1:17.204 | 9 | ||||||
17. | Davidson | Super Aguri | 17. | 1:18.250 | 7 | ||||||
18. | Speed | Toro Rosso | 18. | 1:18.390 | 7 | ||||||
19. | Sutil | Spyker | 19. | 1:18.418 | 8 | ||||||
20. | R.Schumacher | Toyota | 20. | 1:18.539 | 8 | ||||||
21. | Sato | Super Aguri | 21. | 1:18.554 | 10 | ||||||
22. | Albers | Spyker | 22. | No time | 3 |
* Tími Coulthard í annarri lotu strikaður út þar sem hann hindraði för Kovalainen