Íþróttir | Formúla 1 | mbl | 16.6.2007 | 18:04 | Uppfært 21:42

Hamilton á ráspól í Indianapolis og Alonso annar

Hamilton á ferð í Indianapolis þar sem hann vann annan ráspól sinn í ár. reuters

Lewis Hamilton hjá McLaren var í þessu að vinna ráspól bandaríska kappakstursins í Indianapolis eftir spennandi keppni við liðsfélaga sinn Fernando Alonso. Hefur hann því keppni fremstur annað mótið í röð. Í þriðja og fjórða sæti urðu Ferrariþórarnir Felipe Massa og Kimi Räikkönen.

Hamilton vann einnig ráspól í Montreal fyrir viku og í dag var hann tæpum tveimur brotum fljótari með hringinn en Alonso. Silfurörvar McLaren verða á fremstur rásröðinni í Indianapolis, eða þriðja mótið í röð á árinu; voru það einnig í Mónakó og Montreal.

Keppni McLarenfélaganna um pólinn var jöfn og tvísýn allt til loka. Alonso setti besta tíma í fyrstu tveimur lotum en Hamilton var skammt á eftir. Í lokalotunni var Alonso fljótari á fyrstu tveimur tímasvæðum brautarinnar af þremur en Hamilton mun fljótari á lokakaflanum og það dugði honum til að slá heimsmeistaranum við.

Massa varð eina ferðina enn hlutskarpari Räikkönen í tímatökum en tími þess síðarnefnda var meira en hálfri sekúndu lakari en tími Hamiltons, sem er mikill munur.

Nick Heidfeld á BMW varð fimmti en mest kom Heikki Kovalainen á Renault á óvart með sínum besta tímatökuárangri á ferlinum, sjötta sæti. Fylgir þar með eftir góðum árangri í Montreal, þar sem hann lauk keppni í fjórða sæti.

Nýliðinn Sebastian Vettel hjá BMW stóð sig einnig einstaklega vel í sinni fyrstu tímatöku á ferlinum; komst léttilega í gegnum tvær fyrstu loturnar og varð sjöundi. Hóp 10 bestu fylltu svo Jarno Trulli á Toyota, Mark Webber á Red Bull og Giancarlo Fisichella á Renault.

David Coulthard á Red Bull var innan við sekúndubroti frá því að komast í lokaslaginn og hefur keppni ellefti. Byrjar næst á undan Ralf Schumacher hjá Toyota sem með 12. sætinu náði betri árangri í tímatöku en nokkru sinni frá í Malasíukappakstrinum. Síðustu þrjú mót hefur Ralf ekki komist áfram úr fyrstu lotu, þ.e. hafið keppni aftar en í 16. sæti.

Niðurstaða tímatökunnar varð annars sem hér segir:

Tímatakan í Indianapolis			Lota 1			Lota 2			Lota 3
Röð	Ökuþór	Team	Röð	Tími	Hri.	Röð	Tími	Hri.	Röð	Tími	Hri.
1.	Hamilton	McLaren	3.	1:12.563	3	2.	1:12.065	3	1.	1:12.331	13
2.	Alonso	McLaren	1.	1:12.416	3	1.	1:11.926	3	2.	1:12.500	12
3.	Massa	Ferrari	5.	1:12.731	5	4.	1:12.180	3	3.	1:12.703	12
4.	Räikkönen	Ferrari	6.	1:12.732	4	3.	1:12.111	6	4.	1:12.839	12
5.	Heidfeld	BMW	2.	1:12.543	4	5.	1:12.188	3	5.	1:12.847	13
6.	Kovalainen	Renault	8.	1:12.998	6	6.	1:12.599	6	6.	1:13.308	12
7.	Vettel	BMW	4.	1:12.711	6	8.	1:12.644	6	7.	1:13.513	12
8.	Trulli	Toyota	12.	1:13.186	7	10.	1:12.828	7	8.	1:13.789	12
9.	Webber	Red Bull	16.	1:13.425	7	9.	1:12.788	6	9.	1:13.871	12
10.	Fisichella	Renault	11.	1:13.168	6	7.	1:12.603	6	10.	1:13.953	12
11.	Coulthard	Red Bull	15.	1:13.424	8	11.	1:12.873	7
12.	R.Schumacher	Toyota	7.	1:12.851	7	12.	1:12.920	6
13.	Button	Honda	14.	1:13.306	6	13.	1:12.998	6
14.	Rosberg	Williams	9.	1:13.128	6	14.	1:13.060	6
15.	Barrichello	Honda	13.	1:13.203	6	15.	1:13.201	6
16.	Davidson	Super Aguri	10.	1:13.164	7	16.	1:13.259	6
17.	Wurz	Williams	17.	1:13.441	6
18.	Sato	Super Aguri	18.	1:13.477	7
19.	Liuzzi	Toro Rosso	19.	1:13.484	7
20.	Speed	Toro Rosso	20.	1:13.712	7
21.	Sutil	Spyker	21.	1:14.122	6
22.	Albers	Spyker	22.	1:14.597	7