Gríðarleg keppni átti sér stað um ráspól tyrkneska kappakstursins og skipti hann nokkrum sinnum um hendur í lokalotunni. Eftir spennandi og harðan slag hafði Felipe Massa hjá Ferrari betur gegn ökumönnum McLaren. Heikki Kovalainen varð annar og Lewis Hamilton þriðji.

Með þessu styrkti Massa stöðu sína vel í tilraunum til að vinna tyrkneska kappaksturinn þriðja árið í röð. Fyrri árin tvö hóf hann einnig keppni fremstur og ók í bæði skipti til öruggs sigurs.

Félagi hans Kimi Räikkönen átti erfitt uppdráttar í lokalotunni, gerði þá m.a. akstursmistök í beygjum og varð að sætta sig við fjórða sætið.

Kovalainen og Hamilton beittu hvor sinni áætluninni í lokalotunni, Hamilton notaði harðari dekkin í báðum tímatilraunum sínum en Kovalainen þau mýkri í seinni tilrauninni. Þau reyndust betri því hann bætti tíma sinn talsvert; komst fram úr Hamilton og sat hann í nokkrar sekúndur á  ráspól, eða þar til Massa lét til skarar skríða á síðustu stundu.

Robert Kubica á BMW varð fimmti og fjórum sætum á undan liðsfélaga sínum Nick Heidfeld sem varð níundi.

Red Bull kom báðum bílum í lokalotuna í fyrsta sinn á árinu. Mark Webber og David Coulthard tóku hins vegar aðeins eina tímatilraun í lokalotunni, líklega til að spara bensín til kappakstursins.

Jarno Trulli breytti ekki út af þeirri venju að komast í lokalotuna, það hefur hann gert í öllum mótum ársins. Liðsfélagi hans  Timo Glock varð hins vegar fimmtándi.

Fernando Alonso var með fjórða besta tímann eftir fyrri tímatilraunina í lokalotunni en hélt þeirri stöðu ekki, varð sjöundi.

Rubens Barrichello gat ekki haldið upp á metkappakstur sinn með því að komast í lokalotuna. Hann hefur þó 257. sitt einu sæti framar en liðsfélagi hans Jenson Button, þar sem Hondurnar urðu í 12. og 13. sæti.

Niðurstaða tímatökunnar varð annars sem hér segir:

Röð	Ökuþór	Bíll	Lota 1	Lota 2	Lota 3	Hri.
1.	Massa	Ferrari	1:25.994	1:26.192	1:27.617	16
2.	Kovalainen	McLaren	1:26.736	1:26.290	1:27.808	16
3.	Hamilton	McLaren	1:26.192	1:26.477	1:27.923	15
4.	Räikkönen	Ferrari	1:26.457	1:26.050	1:27.936	17
5.	Kubica	BMW	1:26.761	1:26.129	1:28.390	17
6.	Webber	Red Bull	1:26.773	1:26.466	1:28.417	17
7.	Alonso	Renault	1:26.836	1:26.522	1:28.422	18
8.	Trulli	Toyota	1:26.695	1:26.822	1:28.836	20
9.	Heidfeld	BMW	1:27.107	1:26.607	1:28.882	20
10.	Coulthard	Red Bull	1:26.939	1:26.520	1:29.959	16
11.	Rosberg	Williams	1:27.367	1:27.012		13
12.	Barrichello	Honda	1:27.355	1:27.219		13
13.	Button	Honda	1:27.428	1:27.298		14
14.	Vettel	Toro Rosso	1:27.442	1:27.412		15
15.	Glock	Toyota	1:26.614	1:27.806		15
16.	Nakajima	Williams	1:27.547			9
17.	Piquet	Renault	1:27.568			7
18.	Bourdais	Toro Rosso	1:27.621			8
19.	Fisichella	Force India	1:27.807			10
20.	Sutil	Force India	1:28.325			9