Nýjar reglur um vélar formúlubílanna á árunum 2017 til 2020 eru loks í höfn. Margra mánaða viðræður og þrætur um verð og aðgengi að vélunum hafa þar með leitt til niðurstöðu.
Fyrir það fyrsta mun verð á vélum til viðskiptaliða vélsmiðsins lækka stórlega frá því sem nú er samkvæmt samkomulaginu. Þannig mun vélareintak lækka um eina milljón evra 2017 frá 2016-verðinu og um þrjár milljónir evra til viðbótar 2018.
Dregið verður úr kostnaði við smíði vélanna með breytingum á tæknireglum 2017 og 2018 þar sem fækkað verði jafnt og þétt hversu mörgum vélum og einstökum vélarhlutum hver ökumaður fær úr að spila á hverri vertíð.
Auknar skyldur eru lagðar á vélarframleiðendur að leggja liðum til aflrásir. Fari svo að lið standi frammi fyrir því að fá ekki samning um vélar getur Alþjóða akstursíþróttasambandið (FIA) skikkað vélsmið til að taka það upp á arma sína.
Ennfremur kveður samkomulagið á um ýmsar aðgerðir til að jafna vélarafl liðanna allra. Sérstakar heimildir til uppfærsla vélbúnaðar falla niður 2017 og settar verða skorður við þyngd og stærð einstakra hluta aflrásarinnar og takmarkað verður hvaða málma megi brúka við smíði þeirra.
Loks kveður samkomulagið á um rannsóknir um leiðir til að bæta hljóð sem stafa frá vélum formúlu-1 bílanna, sem þótt hefur ekki nógu kröftugt um tveggja ára skeið.