Nico Rosberg hjá Mercedes tók völdin á seinni æfingu dagsins í Marina-brautinni í Singapúr. Setti hann langbesta tímann á hringnum og var 0,275 sekúndum fljótari en næsti maður, Kimi Räikkönen hjá Ferrari.

Á morgunæfingunni ók Max Verstappen á Red Bull hraðast en hann átti þriðja besta hringinn á seinni æfingunni, var 0,1 sekúndu lengur í förum en Räikkönen.  

Í sætum fjögur til tíu á henni urðu - í þessari röð - Daniel Ricciardo hjá Red Bull, Sebastian Vettel hjá Ferrari, Nico Hülkenberg hjá Force India,  Lewis Hamilton hjá Mercedes, Carlos Sainz hjá Toro Rosso, Fernando Alonso hjá McLaren og Daniil Kvyat hjá Toro Rosso.
 
Athygli vekur að Hamilton var röskri sekúndu lengur með hringinn en liðsfélagi hans Rosberg. Á honum og Kvyat í tíunda sæti munaði rétt tæpum tveimur sekúndum.