Lewis Hamilton vann fyrstu lotuna í sálfræðihernaði helgarinnar gegn liðsfélaga sínum, Nico Rosberg. Þeir takast á um heimsmeistaratitil ökumanna á vertíðinni sem lýkur á sunnudag í Abu Dhabi.
Hamilton var tæplega 0,3 sekúndum fljótari með hringinn en Rosberg og tíma sinn setti hann á ofurmjúkum dekkjum. Hann slapp með skrekkinn um miðbik æfingarinnar er hann snarsneri bílnum í beygjuhlykknum sem markar fimmtu og sjöttu beygju brautarinnar.
Rosberg hefur 12 stiga forskot á Hamilton í titilslagnum og dugar þriðja sætið í kappakstri sunnudagsins til að vinna titilinn, að því gefnu að Hamilton vinni.
Ökumenn Red Bull fylgdu Mercedesþórunum fasts eftir. Max Verstappen var einungis 54 þúsundustu á eftir Rosberg í þriðja sæti. Þá varð Daniel Ricciardo aðeins 65 þúsundustu á eftir liðsfélaga sínum í fjórða sæti.
Ökumenn Mercedes og Red Bull voru vel á undan Sebastian Vettel sem átti fimmta besta tímann, rúmlega sekúndu á eftir Hamilton. Í sætum sex til tíu - í þessari röð - urðu Sergio Pérez hjá Force India, Kimi Räikkönen hjá Ferrari, Carlos Sainz hjá Toro Rosso, Felipe Massa hjá Willliams og Marcus Ericsson hjá Sauber.