Landsliðskonan Diljá Ýr Zomers fór vægast sagt á kostum í stórsigri OH Leuven á Genk, 8:0, í meistarariðli efstu deildar belgíska fótboltans í Leuven í dag.
Leuven er í toppsæti deildarinnar með 25 stig, jafnmörg og Standard Liege.
Diljá skoraði fjögur mörk, helminginn af mörkum Leuven, og eitt þeirra úr vítaspyrnu, en hún er markahæst leikmanna liðsins á þessu tímabili með 17 mörk og hefur leikið frábærlega síðan hún kom til félagsins í byrjun tímabilsins frá Norrköping í Svíþjóð.