Pólland tryggði sér í kvöld sæti á EM 2024 í Þýskalandi í sumar með því að leggja Wales að velli eftir vítaspyrnukeppni í úrslitaleik umspils um laust sæti á mótinu í Cardiff.
Markalaust var eftir venjulegan leiktíma og sömuleiðis að lokinni framlengingu.
Því þurfti vítaspyrnukeppni til þess að knýja fram sigurvegara.
Pólland hafði betur í henni, 5:4, með því að skora úr öllum fimm spyrnum sínum á meðan Daniel James klúðraði fimmtu og síðustu spyrnu Wales.
Hana varði Wojciech Szczesny í marki Póllands.