Aron Pálmarsson spilar tímamótalandsleik annað kvöld og það á gamla heimavelli sínum í Kaplakrika þegar Íslendinga mæta Portúgölum í fyrri vináttulandsleiknum af tveimur. Leikirnir eru liður í undirbúningi landsliðsins fyrir Evrópumótið í Póllandi en Ísland mætir Noregi í fyrsta leik eftir tíu daga.
„Það verður frábært að mæta aftur í Krikann. Ég held að ég hafi ekki spilað þar síðan 2009. Leikirnir sem við höfum spilað hafa yfirleitt farið fram í Laugardalshöllinni og einstöku sinni á Ásvöllum en það er löngu orðið tímabært að fara með landsleiki í aðalhúsið í Hafnarfirði. Ég er mjög spenntur fyrir þessu og hvet landsmenn til að mæta og ekki síst alla FH-inga,“ sagði Aron við Morgunblaðið eftir æfingu landsliðsins í gær.
Í leikjunum 99 sem Aron hefur spilað fyrir Íslands hönd hefur hann skorað 373 mörk en hann lék sinn fyrsta landsleik árið 2008, þá 18 ára gamall.
Sjá viðtalið í heild í íþróttablaði Morgunblaðsins í dag.