„Við erum svolítið blóðheitir allir. Við höfum verið svona í allan vetur, látið hver annan heyra það, en þetta var kannski fullmikið af því góða í dag. Ég get alveg viðurkennt það,“ sagði Orri Freyr Gíslason, línumaður Vals, eftir 20:18-tapið gegn Fram í Olís-deildinni í handbolta í dag.
Valsmenn skömmuðu hver annan reiðilega undir lok leiksins, og þegar flautað hafði verið til leiksloka, enda er liðið í frjálsu falli í Olís-deildinni og hefur aðeins unnið einn leik eftir áramót en tapað fimm og gert tvö jafntefli. Bikarmeistararnir eru nú í 5. sæti deildarinnar, tveimur stigum á undan Gróttu og Selfossi.
„Það er bara ekkert að ganga upp hjá okkur. Við vorum með 18 tæknifeila í dag. Hefur eitthvert lið unnið leik með 18 tæknifeila? Svo erum við alltaf að kenna næsta manni um, í stað þess að spila sem eitt lið. Þá eigum við ekki skilið að vinna. Framararnir sýndu klassahjarta. Það sást í augunum á þeim hvað þeir vildu en við vorum hægir í öllu. Þegar við vorum að komast í gegn náðu þeir alltaf að brjóta á okkur, í stað þess að við fleygðum okkur inn í færið,“ sagði Orri.
Valsmenn urðu bikarmeistarar fyrir skömmu og eru komnir í 8-liða úrslit Áskorendabikars Evrópu þar sem þeir spila næsta laugardag. Er ekki bara komin mikil þreyta í hópinn?
„Við erum ekkert þreyttir. Við erum alveg að passa það að æfa ekki mikið á milli leikja. Það sem er að er það að við erum ekki að spila sem lið. Það er vandamálið í dag. Sóknarleikurinn er að drepa okkur. Við gerum allir of mikið af mistökum, látum ekki boltann rúlla og brjótum okkur alltaf út úr kerfunum sem við ætlum að spila,“ sagði Orri.