„Við vitum að báðir þessir leikir verða gríðarlega erfiðir enda voru bæði þessi lið í lokakeppni EM í sumar,“ segir Ívar Ásgrímsson, þjálfari kvennalandsliðs Íslands í körfubolta, en liðið mætir Svartfjallalandi og Slóvakíu á næstu dögum í undankeppni EM.
Leikurinn við Svartfjallaland er fyrsti leikur Íslands í undankeppninni og hefst hann kl. 16 á morgun í Laugardalshöll.
„Við vitum að þetta verða mjög sterkir andstæðingar og að við þurfum að mæta mjög einbeittar til leiks til þess að eiga séns. Þær [Svartfellingar] eru stórar, meðalhæðin er 185 sentímetrar, og þær eru líka sterkar og grimmar. Við þurfum því að vera mjög öguð í okkar sóknarleik og megum ekki tapa boltanum oft á móti þeim, því þær eru fljótar að refsa eins og öll góð lið,“ segir Ívar.
„Við þurfum að halda áfram að byggja á okkar varnarleik sem hingað til hefur verið fínn. Vandamálið hefur verið að skora, og okkur hefur vantað dálítið upp á betri nýtingu, því við höfum fengið fín færi. Það er það sem við þurfum að laga, og koma einbeitt til leiks,“ segir Ívar.
Íslenska liðið hefur sýnt það á undanförnum árum að á góðum degi getur það náð frábærum úrslitum, sérstaklega í Laugardalshöllinni þar sem Portúgalar og Ungverjar hafa til að mynda lotið í lægra haldi.
„Stóri sigurinn gegn Ungverjum [í febrúar 2016] sýndi að við getum unnið allar þessar bestu þjóðir. Hann segir margt um hvað þetta lið getur. Þá hittum við mjög vel. Helena [Sverrisdóttir] hitti gríðarlega vel í byrjun, og aðrar komu með. Um leið og við hittum vel fyrir utan erum við í fínum málum. Vörnin okkar er orðin það góð í dag. Við erum ekki með mikið af skorurum við teiginn og þurfum að stóla á að leikmenn hitti utan þriggja stiga línunnar. Ef það gengur ekki verður þetta mjög erfitt,“ segir Ívar.
Helena Sverrisdóttir gat ekki leikið með landsliðinu síðasta vetur enda gekk hún þá með sitt fyrsta barn, en hún var mætt aftur í liðið strax í byrjun síðasta sumars. Ungir leikmenn liðsins hafa öðlast góða reynslu og nú hefur atvinnumaðurinn Hildur Björg Kjartansdóttir bæst í hópinn eftir að hafa verið í háskólanámi í Bandaríkjunum undanfarna vetur.
„Við erum að styrkjast og munum styrkjast á komandi árum. Það munu leikmenn bætast við liðið á næstu tveimur árum sem hafa verið að spila í Bandaríkjunum, og í því felst gríðarlegur styrkur. Að sama skapi höfum við verið að taka ungar stelpur inn í liðið sem fengu mikla eldskírn í fyrra þegar Helena datt út. Núna er reyndar Gunnhildur [Gunnarsdóttir] dottin út, og við söknum hennar auðvitað því hún spilaði stórt hlutverk hjá okkur, en þessar ungu stelpur eru grimmar, hafa trú á verkefninu og eru orðnar vanar því að spila í undankeppnum með U18- og U20-landsliðunum. Hann hjálpar okkur gríðarlega, þessi metnaður sem KKÍ hefur sýnt við að láta yngri landsliðin spila í Evrópukeppnum. Við þurfum að spila við sterkar þjóðir til að verða betri, og það hafa þær gert í yngri landsliðunum. Þær koma því ekki eins hræddar inn í A-landsliðið. Þær vita hvað þær eru að fara út í,“ segir Ívar.