Nyhedsavisen mest lesna fríblaðið á Fjóni

Blaðið Nyhedsavisen, sem Dagsbrun Media gefur út í Danmörku, er mest lesna fríblaðið á Fjóni en fríblaðið 24timer er mest lesið á öðrum svæðum í Danmörku þar sem því er dreift ókeypis í hús. Þriðja fríblaðið, Dato, hefur minnsta útbreiðslu en er þó næst mest lesið af fríblöðunum í Kaupmannahöfn og á Friðriksbergi.

Fram kemur á fréttavef Børsen að fríblöðin þrjú berjist hart um lesendur á einstökum svæðum í Danmörku. Þar hafi 24timer, sem JP/Politikens Hus gefur út, víðast hvar forustuna, einkum þó á Suður-, Norður- og Vestur-Jótlandi þar sem hinum blöðunum tveimur er ekki dreift með reglubundnum hætti.

Børsen vitnar til talna úr LæserBarometret, sem mælir fjölda lesenda fríblaðanna. Þar kemur fram að 54 þúsund manns á Fjóni lesa Nyhedsavisen að jafnaði, þar af 50 þúsund í Óðinsvéum eða litlu færri en lesa Fyens Stiftstidende, sem til þessa hefur haft yfirburðastöðu þar.

Í miðborg Kaupmannahafnar og á Friðriksbergi eru lesendur 24timer 85 þúsund, lesendur Dato eru 70 þúsund og lesendur Nyhedsavisen 48 þúsund. Á Kaupmannaghafnarsvæðinu öllu eru lesendur 24timer hins vegar 117 þúsund en Nyhedsavisen fylgir fast á eftir með 100 þúsund lesendur.

Alls lesa 464 þúsund Danir 24timer daglega, lesendur Nyhedsavisen voru 249 þúsund og lesendur Dato189 þúsund.

• 1 blogg um fréttina

Bloggað um fréttina

• Snorri Bergz: Litlu verður Vöggur feginn