Úr gríðarmiklum hagnaði í taprekstur

Greiningardeild Kaupþings spáir 27 milljarða króna tapi á rekstri FL …
Greiningardeild Kaupþings spáir 27 milljarða króna tapi á rekstri FL Group á þriðja ársfjórðungi.

Meðbyrinn sem var á hlutabréfa- og fjármálamörkuðum á fyrri helmingi ársins hefur snúist upp í andbyr á þriðja fjórðungi ársins. Þetta kemur meðal annars skýrt fram í nýrri spá greiningardeildar Kaupþings banka um afkomu fjárfestinga- og rekstrarfélaganna Existu og FL Group á þriðja fjórðungi ársins. Greiningardeildin spáir því að verulegt tap verði af rekstri félaganna eða um 9,6 milljarðar hjá Existu og 27 milljarðar hjá FL Group.

Til marks um þau miklu umskipti sem hafa orðið skömmum tíma má nefna að á fyrri helmingi ársins var Exista rekið með um 71,2 milljarða króna hagnaði og FL Group með 23,1 milljarðs króna hagnaði.

Tap vegna lækkunar bréfa

Exista mun birta fjórðungsuppgjör sitt í næstu viku en greiningardeild Kaupþings banka spáir því að tap félagsins eftir skatta á þriðja fjórðungi ársins muni nema 112,3 milljónum evra eða um 9,6 milljörðum íslenskra króna og segir að tapið megi rekja til þess að verð skráðra hlutabréfa hafi lækkað mikið á fjórðungnum, þ.ám. bréf Bakkavör Group og norska tryggingafélagsins Storebrand en Exista er stór hluthafi í félögunum.

Sem kunnugt er notar Exista hlutdeildaraðferð á eign sína í Kaupþingi banka og Sampo, þ.e. reiknar sér ekki til tekna eða gjalda hækkun eða lækkun á gengi bréfa í þeim félögum heldur hluta af hagnaði þeirra í takt við eign sína í þeim en Exista á 20% í Sampo og 23% í Kaupþingi banka.

Töluverð óvissa í spánni

FL Group reiknar sér til tekna eða gjalda breytingar á markaðsvirði hlutabréfa í sinni eigu og færir sem óinnleystan gengishagnað eða gengistap. Sérfræðingar Kaupþings banka segja verðmæti eignasafns FL Group hafa minnkað mikið á þriðja fjórðungi ársins og þeir spá því að tap FL Group á þriðja fjórðungi ársins muni nema 27 milljörðum króna. Þeir taka þó fram að töluverð óvissa sé í spánni þar sem takmarkaðar upplýsingar liggi fyrir um hluta af eignasafni FL Group, fjármögnun þess og hvort FL Group muni uppfæra óskráðar eignir sínar.
Í hnotskurn
» Samanlagður hagnaður Existu og FL Group á fyrri helmingi ársins nam 94,3 milljörðum króna, þar af voru 71,2 milljarðar hjá Existu.
» Kaupþing spáir því að tap þeirra á þriðja fjórðungi verði 36,6 milljarðar, þar af 27 milljarðar hjá FL Group.
Nánar um málið
í Morgunblaðinu
Áskrifendur:
Nánar um málið
í Morgunblaðinu
Áskrifendur:

Bloggað um fréttina

Fleira áhugavert
  ISK
  USD
  EUR
  GBP
  CAD
  DKK
  NOK
  SEK
Fleira áhugavert
  ISK
  USD
  EUR
  GBP
  CAD
  DKK
  NOK
  SEK