Alþjóða gjaldeyrissjóðurinn (IMF) hvatti í dag ríkisstjórnir til þess að fylgjast vel með verðbólgu á meðan glímt er við vandann sem ríkir á alþjóðlegum fjármálamörkuðum. Um helgina fer fram í Washington fundur fulltrúa 185 ríkja sem eiga aðild að sjóðnum.
Telur sjóðurinn nauðsynlegt að ríkin eigi með sér náið samstarf í glímunni við þau vandamál sem steðja að efnahag ríkjanna.
Samþykkt var að IMF muni styrkja hlutverk sjóðsins í að koma á fjármálastöðugleika og sameiginlegri peningamálastefnu. Í þróunarlöndunum eigi að halda áfram að tryggja stöðugleika í verðlagi á matvælum næstu mánuðum en víða í nýmarkaðslöndunum sem og þróunarríkjunum hefur verð á matvælum hækkað umtalsvert sem og eldsneytisverð.