Straumur-Burðarás fjárfestingabanki hf. hefur nýverið gengið frá fjármögnun samtals að fjárhæð 395 milljónir evra, 45,1 milljarð króna. Samkvæmt áætlunum Straums dugir lausafé bankans til að fjármagna rekstur hans fram á síðari hluta næsta árs.
 
Annars vegar er um að ræða 180 milljóna evra sambankalán sem skrifað var undir í dag. Það er í tveimur hlutum; 70 milljónir evra til eins árs með 110 punkta álagi á Euribor vexti og 110 milljónir evra til þriggja ára með 180 punkta álagi á Euribor vexti. Umsjónarbankar lánsins voru Bayern LB, Commerzbank, HSH Nordbank og RZB en alls tóku tíu bankar í fimm löndum þátt í láninu, samkvæmt tilkynningu frá Straumi.
 
Hins vegar er um að ræða tvíhliða lánasamninga við nokkra aðila, samtals að fjárhæð 215 milljónir evra, og er lánstíminn eitt til fimm ár.