Woolworths endanlega gjaldþrota

Breska verslanakeðjan Woolworths er endanlega gjaldþrota og var síðustu 200 verslunum fyrirtækisins lokað í dag og ljósin slökkt. Fyrirtækið var stofnað árið 1909 og rak á tímabili 807 verslanir í Bretlandi. 

Woolworths óskaði eftir greiðslustöðvun í nóvember. Deloitte, sem stýrði greiðslustöðvuninni og gætti hagsmuna þrotabúsins, hélt mikla brunaútsölu á eignum félagsins og tilkynnti í síðasta mánuði að verslunum yrði lokað eftir að leit að kaupanda bar ekki árangur. Um það bil 27.000 manns missa vinnuna. Loka átti verslunum á mánudag en Deloitte heimilaði að verslanir yrðu opnar í einn dag í viðbót til þess að selja afgang af vörubirgðum.

Fyrsta Woolworths verslunin opnaði í Liverpool árið 1909 undir vörumerkinu FW Woolworths sem var dótturfélag bandarísks fyrirtækis. Woolworths, sem hefur selt allt frá sælgæti og leikföngum til heimilis- og raftækja, hefur átt í erfiðleikum undanfarin ár eftir að stórmarkaðir fóru að færa sig inn á svið fyrirtækisins og hirða af því markaðshlutdeild.

• 2 blogg um fréttina

Bloggað um fréttina

• Þórarinn M Friðgeirsson: Áttu baugsmenn ekki hlut í þessari ??
• Ólafur Þórðarson: Gotneska kirkja Kapítalismans.