Frumtak fjárfestir í Trackwell

Frumtak, fjárfestingasjóður í eigu Nýsköpunarsjóðs atvinnulífsins, sex lífeyrissjóða og ríkisbankanna þriggja, hefur nú fjárfest í fyrsta skipti og keypt hlut í nýsköpunarfyrirtækinu Trackwell hf., sem sérhæfir sig í hugbúnaðargerð með sérstakri áherslu á lausnir tengdar fjarskiptum og staðsetningatækni. Trackwell hefur þróað þjónustu sem kallast Trackwell Forðastýring.

Um 300 íslensk fyrirtæki, í öllum geirum atvinnulífsins, nota nú þegar hugbúnaðinn til að stýra og hafa yfirsýn með um 2000 farartækjum og 30.000 starfsmönnum, að því er segir í tilkynningu frá Frumtaki. Trackwell hefur selt vörur og þjónustu til nítján landa í fimm heimsálfum og rekur dótturfyrirtækið Trackwell ADS í Ameríku. Mikil ánægja ríkir með fjárfestinguna hjá Trackwell, að sögn framkvæmdastjóra fyrirtækisins, dr. Eggerti Claessen.

Frumtaki er ætlað að verða burðarás í nýsköpunar og sprotastarfsemi á næstu árum, en sjóðnum var vart hugað líf í haust þegar bankahrunið gekk yfir. Hann starfar þó enn, þrátt fyrir að upphaflegt fyrirhugað framlag bankanna hafi verið lækkað, frá þeim áformum sem voru uppi áður en viðskiptabankarnir féllu.

• 1 blogg um fréttina

Bloggað um fréttina

• Snjólfur Ólafsson: Líkkistur og laseraðgerðir