Sigurður Einarsson: Telur að trúnaðargögnum hafi verið stolið

Sigurður Einarsson, fyrrverandi forstjóri Kaupþings, hefur sent Ragnari Hafliðasyni, settum forstjóra Fjármálaeftirlitsins, bréf og spurt hvað hann hyggist gera vegna trúnaðargagna úr Kaupþingi sem Sigurður telur að hafi verið stolið og notuð til fréttaflutnings í Morgunblaðinu. Þetta kemur fram í Fréttablaðinu í dag.

Sú umfjöllun sem Sigurður vísar til í Morgunblaðinu varðar lán til eigenda Kaupþings og annarra tengdra aðila upp á um 500 milljarða króna. Voru þar nefndir Ólafur Ólafsson í Samskipum, bræðurnir Ágúst og Lýður Guðmundssynir og kaupsýslumaðurinn Robert Tchenguiz.

„Hér er augljóslega um gróft brot á bankaleynd að ræða gagnvart þeim einstaklingum og félögum sem um ræðir," segir í bréfinu sem Sigurður sendi 10. mars," samkvæmt frétt Fréttablaðsins.