Landsbankinn eignast Björgun

Landsbankinn hefur eignast allt hlutafé í verktakafyrirtækinu Björgun ehf. sem var í eigu Renewable Energy Resources ehf. (RER) dótturfyrirtækis Atorku Group hf., en í tengslum við skuldauppgjör RER hefur bankinn leyst til sín þau veð sem bankinn átti í eigum félagsins.

 Landsbankinn hefur þegar fengið undanþágu til samruna bankans og Björgunar ehf. hjá Samkeppniseftirlitinu.  Áætlað er að Landsbankinn muni selja Björgun í opnu söluferli innan 6 mánaða og verður fyrirkomulag þess kynnt þegar nær dregur.  Fyrirtækjaráðgjöf Landsbankans mun annast söluna.

 Björgun ehf. var stofnað 1952 og er þekktast fyrir efnisnám úr sjó og  er stærsti framleiðandi jarðefna til mannvirkjagerðar á Íslandi auk þess að annast framkvæmdir við dýpkun hafna. 

 Um 35 manns starfa hjá Björgun og eru engar breytingar á rekstri félagsins fyrirhugaðar enda er rekstur Björgunar ehf. í jafnvægi, segir í tilkynningu.  Landsbankinn mun skipa Björgun ehf. nýja stjórn til skamms tíma. Framkvæmdastjóri er Gunnlaugur Kristjánsson.

• 2 blogg um fréttina

Bloggað um fréttina

• Sigurður Sigurðsson: Hvaða lífeyrissjóður vill eignast.
• Jón Snæbjörnsson: Detta þau inn hvert af öðru ...........