Skuldabréfamarkaðurinn hrapaði í kjölfar vaxtaákvörðunar Seðlabanka Íslands í gær. Veltan á markaði var sú mesta síðan í október árið 2008, eða rétt um það leyti sem bankakerfið leið undir lok í þáverandi mynd.
Heildarlækkunin, samkvæmt skuldabréfavísitölu GAM Management, var 5,45%, öllu meiri í verðtryggðum hluta vísitölunnar.
Seðlabankinn lækkaði vexti sína um 0,75 prósentustig, og eru stýrivextir nú 6,25% og hafa lækkað ört. Í tilkynningu Seðlabankans kvað við nokkuð annan tón en við síðustu vaxtaákvörðun, en þá var gefið til kynna að enn væri nokkuð í það að farið yrði af krafti í afnám gjaldeyrishafta og svigrúm til frekari vaxtalækkana væri umtalsvert.
Ýmsir hafa gagnrýnt hagvaxtarspá Seðlabankans og segja að bankinn sé of bjartsýnn, að því er fram kemur í Morgunblaðinu í dag. Þar segir, að viðbrögð markaðarins jafngildi vantrausti á Seðlabankann.