Það eina sem hindrar nýtingu aflandskróna til langtímafjárfestinga hér á landi eru ákvarðanir stjórnvalda í þá veru.
Þetta segir Orri Hauksson, framkvæmdastjóri Samtaka iðnaðarins, í umfjöllun um þessi mál í Morgunblaðinu í dag. Í október á síðasta ári kynntu samtökin samvinnuverkefni sitt með Seðlabanka Íslands og efnahags- og viðskiptaráðuneytinu.
Tilgangur þess verkefnis var að gera eigendum aflandskróna kleift að fjárfesta fé sitt til langtímaverkefna hér á landi. Upphaflega bundu Samtök iðnaðarins vonir við að ljúka ákveðnu prófmáli í þeim efnum fyrir áramót. „Ég verð að viðurkenna að ég er orðinn langeygur eftir því að klára þetta mál,“ segir Orri Hauksson.