Ólíklegt að skilyrði samningana haldi

Hagvöxtur verður meiri á næstu árum en áður hafði verið spáð, samkvæmt nýrri þjóðhagsspá Hagstofunnar. Samkvæmt spánni vex hagkerfið um 2,5% á þessu ári og um 3,1% á því næsta, en þessar tölur eru hærri en í spá Hagstofunnar frá því fyrr á árinu.

Þær eru jafnframt hærri en í spám Seðlabankans, Alþjóðagjaldeyrissjóðsins og Efnahags- og framfarastofnunarinnar.

Í fréttaskýringu um mál þetta í Morgunblaðinu í dag segir, að þrátt fyrir hina auknu bjartsýni sé hins vegar ekki gert ráð fyrir því að forsendur nýgerðra kjarasamninga haldi og við því að búast að þeir verði „eitthvað endurskoðaðir á samningstímanum,“ eins og komist er að orði í spánni.

Samningar aðila vinnumarkaðarins eru uppsegjanlegir í ársbyrjun 2012 og 2013 ef forsendur um kaupmátt, gengi krónunnar og verðlag ganga ekki eftir. Í spá Hagstofunnar segir að „harla ólíklegt“ sé að öll skilyrðin haldi. Þrátt fyrir það muni samningar halda að mestu og kaupmáttur aukast á spátímanum.

Samtök atvinnulífsins hafa sagt að eigi atvinnulífið að standa undir nýjum kjarasamningum og kaupmáttur launa að aukast á næstu árum, verði hagvöxtur að vera á bilinu 4-5% á næstu tveimur árum.