Engin breyting fyrir starfsfólk

Sigurður Arnar Sigurðsson, forstjóri Húsasmiðjunnar, segir að ekki verði neinar breytingar á högum starfsfólks Húsasmiðjunnar við yfirtöku Bygma á fyrirtækinu. Bygma mun yfirtaka alla samninga við starfsmenn hjá fyrirtækinu hinn 1. janúar.

Húsasmiðjan hefur verið seld danska byggingavörufyrirtækinu Bygma A/S í opnu söluferli, en tólf tilboð bárust í Húsasmiðjuna og  var tilboð Bygma A/S hagstæðast.

„Við hjá Húsasmiðjunni fögnum því að sterkur aðili skuli nú koma að þessu rótgróna félagi og hlökkum til að hefja nýja sókn á íslenskum byggingavörumarkaði með Bygma sem traustan bakhjarl," segir Sigurður í fréttatilkynningu.

„Starfsfólk og stjórnendur Húsasmiðjunnar hafa gengið í gegnum erfiða tíma undanfarin ár. Enginn vafi leikur á að sá góði hópur fólks sem starfar innan Húsasmiðjunnar hefur unnið þrekvirki við að hagræða í rekstrinum við krefjandi aðstæður. Húsasmiðjan hefur á sama tíma haldið hlutdeild sinni á íslenskum byggingavörumarkaði.

Hinn mikli áhugi fjárfesta á Húsasmiðjunni sem og tilboð danska kaupandans er til marks um að góður árangur hefur náðst í hagræðingu og endurskipulagningu Húsasmiðjunnar. Ljóst er að nýir eigendur hafa trú á framtíð fyrirtækisins. Af því megum við vera stolt,” segir Sigurður ennfremur.

• 1 blogg um fréttina

Bloggað um fréttina

• Páll Vilhjálmsson: Erlend fjárfesting þrátt fyrir gjaldeyrishöft