Fjárfesting enn í lágmarki

Fjárfesting jókst meira á fyrstu sex mánuðum ársins en yfir allt síðasta ár. Engu að síður er fjárfesting sem hlutfall af landsframleiðslu enn í algjöru lágmarki og er langt undir meðalfjárfestingu hérlendis og í samanburði við OECD ríkin. Þetta kemur fram í markaðspunktum greiningardeildar Arion banka.

Aukning í fjárfestingu var ríflega 19% á fyrstu sex mánuðum ársins frá sama tímabili í fyrra. Vöxturinn er því nokkuð meiri en mældist á árinu 2011 þegar fjárfesting jókst um 13% yfir árið í heild. Fjárfesting sem hlutfall af landsframleiðslu mælist nú um 14%, en til samanburðar þá hefur fjárfestingarstigið frá seinna stríði mælst að meðaltali 24% af landsframleiðslu, og í kringum 21% ef leiðrétt er fyrir fjárfestingum í ál- og orkuiðnaði.

Atvinnuvegafjárfesting, sem vigtar 70% af heildarfjárfestingu í landinu er jafnframt enn nokkuð undir 14% langtímameðaltali og í sögulegu lágmarki samanborið við önnur sambærileg ríki. Á síðasta aldarfjórðungi hefur fjárfestingastig meðal OECD ríkja verið í kringum 20% af VLF. Þrátt fyrir að heildarfjárfesting í landinu hafi nú vaxið samfleytt sex fjórðunga í röð, þá er enn nokkuð langt í land að fjárfestingarstigið nái því sem tíðkaðist á árum áðum. 

Fjárfesting sem hlutfall af vergri landsframleiðslu Arion banki

Fjárfestingar atvinnuvega sem hlutfall af vergri landsframleiðslu Arion banki

• Blogga um frétt