Ný upplýsingaveita um sprotafyrirtæki

Nýsköpunarmiðstöð Íslands hefur nú sett í loftið vefinn Sprotar.is, en það er upplýsingaveita sem er ætlað að vera helsti vettvangur upplýsingamiðlunar um íslensk sprotafyrirtæki og starfsumhverfi þeirra. Í tilkynningu segir að með þessu vilji Nýsköpunarmiðstöð Íslands meðal annars auka skilning stjórnvalda á mikilvægi sprotafyrirtækja fyrir íslenskt atvinnulíf og atvinnusköpun, auka umfjöllun um fyrirtækin, gera þau sýnilegri gagnvart innlendum og erlendum fjárfestum og styrkja ímynd þeirra og mikilvægi hjá almenningi. 

Á síðunni er að finna yfirlit yfir þau fyrirtæki sem enn eru skilgreind sem sprotar og er ætlunin með birtingunni að gefa almenningi og hluteigandi aðilum almenna sýn yfir stöðu mála í umhverfi sprota í dag. Fyrirtækjalistinn á síðunni er í stöðugri þróun og alls ekki tæmandi en til að byrja með er hann einskorðaður við lítil og meðalstór nýsköpunarfyrirtæki í hátækniiðnaði á Íslandi sem stunda rannsóknir og þróun. Fyrirtækin eru nú 135 talsins og fer fjölgandi og það með aðstoð hagsmunaaðila. 

Heimasíðan sprotar.is

• Blogga um frétt